Grant a roddwyd i: Morgan Jones
Cyfraniad Ymddiried: £5,000
Hoffwn ddechrau drwy ddiolch yn fawr iawn i Ymddiried am roi grant o £5,000 i mi tuag at fy hyfforddiant proffesiynol mewn gwallt a cholur! Fe wnaeth y gefnogaeth hael hon fy helpu i ddilyn cwrs The Advanced Complete Makeup Artist yn y Delamar Academy of Makeup and Hair yn Llundain, sydd yn fawr iawn ei barch. Roedd y cyllid yn anhygoel, gan helpu gyda chostau sylweddol ffioedd dysgu, llety a theithio, ac yn y pen draw yn caniatáu i mi ddilyn llwybr gyrfa rwy’n angerddol iawn amdano.
Mae effaith y cwrs hwn ar fy ngyrfa wedi bod yn drawsnewidiol. Ers cwblhau fy astudiaethau, rwyf wedi llwyddo i gael cyflogaeth trwy Academi Delamar a thiwtoriaid a’m hargymhellodd ar gyfer cyfleoedd proffesiynol, yn ogystal â fy rhwydweithio fy hun.
Er bod llawer o fy ngwaith presennol o dan gytundebau dim datgelu (NDAs) llym, yn enwedig mewn teledu a ffilm, gallaf rannu rhai o’r cynyrchiadau rwyf wedi gallu cyfrannu atynt:
- Strictly Come Dancing: gweithio ar gystadleuwyr a pherfformwyr ar gyfer darllediadau byw.
- Wythnos Ffasiwn Llundain: cyfrannu at ddiwyg runway i nifer o ddylunwyr.
- BBC Cymru ac S4C: cynorthwyo ar sawl prosiect teledu a ffilmiwyd ger fy nhref enedigol.
- Cynyrchiadau Apple TV, Netflix, BBC Lloegr, BBC yr Alban: cefnogi adrannau colur a gwallt ar y set ar gyfer cynnwys ffrydio rhyngwladol.
- Ymgyrchoedd ffilmio a fideo brand mawr: cyfrannu at hysbysebu a ffilmio masnachol ar gyfer cwmnïau byd-eang adnabyddus, fel TK Maxx a First Aid Beauty.
Mae’r profiadau hyn wedi fy ngalluogi i adeiladu rhwydwaith proffesiynol cryf a datblygu fy mhortffolio ar draws gwahanol sectorau’r diwydiant, o waith harddwch a gwaith golygyddol i gynyrchiadau teledu a sinema ar raddfa fawr. Yn bwysicaf oll, maent wedi rhoi’r hyder i mi weld fy hun fel artist proffesiynol sy’n gweithio, nid dim ond myfyriwr graddedig. Mae pob cyfle rydw i wedi’i gael ers cwblhau’r cwrs yn deillio’n uniongyrchol o’r addysg a’r cysylltiadau y mae cyllid Ymddiried wedi helpu i’w gwneud yn bosib.
Fy nod tymor hir yw parhau i ddatblygu fel artist gwallt a cholur o fewn ffilm, teledu a ffasiwn. Ar hyn o bryd rydw i’n ehangu fy nghit proffesiynol a’m portffolio ac yn parhau i rwydweithio â gweithwyr proffesiynol y diwydiant rydw i wedi’u cyfarfod trwy fy swyddi diweddar. Rydw i hefyd yn gobeithio cyfrannu nôl i’r gymuned greadigol Gymreig trwy weithio ar fwy o gynyrchiadau yng Nghymru, mentora artistiaid uchelgeisiol, a hyrwyddo llwybrau i’r diwydiant i eraill nad ydyn nhw efallai’n credu bod cyfleoedd o’r fath yn bosib. Fel hyn, bydd y buddsoddiad a wnaeth Ymddiried ynof fi yn parhau i ledaenu gan fy mod eisiau helpu eraill o gefndiroedd tebyg i ddod o hyd i’w ffordd yn y maes hwn. Diolch am fy helpu i gymryd y cam rhyfeddol hwn yn fy mywyd.
